英格兰联赛盃八强激战，布力般主场对阿仙奴，虽然兵工厂先两日先至将全副精神集中喺英超砌低车仔，但系对於生牯仔而言，联赛盃一样咁重要，希望好似上季一路杀入决赛，所以奋斗心好强，力足作客淘汰布力般。至於喺主场赢到开巷嘅曼城，对住回勇嘅热刺亦可以继续高歌猛进。
阿仙奴按照惯例会用新秀踢联赛盃，上两轮对锡菲联同纽卡素一样踢到有声有色，佢地近期喺欧联无关痛痒比赛将大部分年轻球员提升到一队，根本好多时都捞埋一齐踢，所以实力唔会差太远，呢季作客都好有板斧嘅阿仙奴，班生牯仔认真唔讲得笑，以其人之道还治其人之身，对住布力般呢种烂仔型踢法嘅球队，就用番硬朗招数，战术好简单又有效，破坏对方中场节奏，快速走位第一时间交波等住机会反击，整体运作日趋成熟，减少浪费进攻机会嘅情况，当然入波成功率就大增，而且球员状态弗到漏油，佢地一直对上季杀入决赛输畀车仔耿耿於怀，今季目标再次指向冠军，一定打醒十二分精神，对近况一落千仗嘅布力般都唔敢怠慢。
曼城喺主场系信心嘅保证，佢地今季连埋联赛盃十战全胜，後上击败保顿展示锐利反击，领队艾历臣明白作为一支新埋班球队，专拣杯赛喺主场出击成功机会大好多，又点会轻易放过！热刺作客爆冷赢朴茨茅夫，主要系拜对手失准所赐，呢场系咁先！
