英冠卡迪夫城越级挑战朴茨茅夫，球员面对温布莱球场咁大场面，临场心理因素变成好关键，呢方面朴茨茅夫明显较占优势。
喺足总杯历史上，只有过八支非顶级联赛嘅球队捧杯， 家阵朴茨茅夫要扞卫英超球队嘅名声，其实，睇番今季足总杯频频爆冷，再次引证当两支实力差距过大嘅球队相遇时，双方心理同战斗意志会出现微妙嘅此消彼长，令到弱势嘅一方成功爆冷。不过，朴茨茅夫唔系豪门而系一支平民球队，喺温布莱可以摆正心态。
列纳系英格兰口碑最好嘅「土炮」主帅之一，呢季买入嘅外援质素唔差，当中唔少系国脚级人马见惯大场面，较容易适应到温布莱球场嘅决赛气氛，虽然喺英超最後几场走晒样，但系摆明留力，况且之前喺客场赢波仲多过喺主场，既然朴茨茅夫系英超四大豪门以外畀人工最多嘅球队，球员都知道系时候做好呢份工，一定全力为列纳赢佢执教生涯首座奖杯。
主要靠一班过气英超球员撑住嘅卡迪夫城，讲阵容都拍得住英超尾球队，但系到温布莱踢决赛，对逐渐褪色或者进入职业生涯尾声嘅球员，心理包袱会更加重而影响临场发挥。尤其系离开自己地头表现差好多，英冠作客赢波率唔够两成，前锋入波能力低好多，导致後防承受更大压力，呢次恶唔出样喇！
