欧国盃终极一战西班牙对德国，睇番西班牙由小组赛开始踢到准决赛，晋级过程极具说明力，加上主帅阿拉干利斯老谋深算，面对喺近两场淘汰赛失四球嘅德国，西班牙可望捧走欧国盃。
德国喺计埋小组赛嘅五场波当中，只系对波兰叫做赢得清脆俐落，输畀克罗地亚就被技术性击倒，其余三场波要食尽惊风散先至赢到，如果德国唔系话保留番两年前世界杯嘅骨干加强稳定性，仲有普度斯基、高路斯、波历克等搏晒老命入波，真系几难弥补後防嘅错漏，连对弱势嘅土耳其都要失两粒，明显弱点喺中场拦截，而且进攻太过集中左路，右边相对组织力唔足够，遇到攻势咁劲嘅西班牙会暴露出缺口。
依家状态弗到爆嘅西班牙，先後淘汰意大利同俄罗斯，战术运用刚柔并重，阿拉干利斯喺每一个细节都做得好透彻，佢深明防守系现代足球取胜嘅基础，根本唔畀对手有太多机会起脚射门，意大利同俄罗斯喺对住西班牙两场加埋只有二十一脚射门，射中竟然只有四次，西班牙立於不败之地，再利用简单直接有效致命传送反击，直插对手心脏，兼且後备席上嘅沙比阿朗素、古尔沙同费比加斯都强过德国，西班牙喺时候发威！
