近几年表现乏善足陈嘅英格兰重新上路，开始世界盃外围赛之旅，「三狮兵团」再次成为被关注嘅焦点，亦系卡比路上任後第一场正式比赛，无论领队同球员一定会打醒十二分精神省靓个招牌，作客安道尔大开杀戒！
卡比路一向畀人嘅感觉都系好有个性，尤其系呢次选人放弃奥云同高治，竟然用希斯基，千祈唔好以为佢乱点鸳鸯谱，事关希斯基喺旧年欧国盃对以色列同俄罗斯嘅时候，高空优势好明显，间唔中会大派用场，特别系对付唔善於高空防守嘅安道尔，所以点解以前嘅艾历臣、麦卡伦同卡比路依家都睇中希斯基，加埋朗尼、迪科尔同禾确特，英军进攻战术都算多元化。
至於条後防线由红魔鬼同车仔守卫组成，可以话系「三狮兵团」近几年最有国际赛经验同最强嘅防线，对住攻力疲乏嘅安道尔绰绰有余，顺便当练兵准备埋下周中对克罗地亚场硬仗。如果人脚鼎盛嘅英格兰呢场唔能够大炒对手，试问点向乡绅父老交代，卡比路要保金漆招牌，球员更加要吐气扬眉！
