欧联先至踢完两轮分组赛，但系亚洲联赛冠军盃已经去到四强赛阶段，傍晚阿德莱德联主场痛击宾约哥，近况欠佳嘅浦和红钻作客大阪飞脚险过剃头！
澳洲自从加入亚洲足协之後一直都冇乜大作为，阿德莱德联呢次入到四强令人出乎意料之外，但系睇番佢地喺八强赛淘汰鹿岛鹿角嘅两回合比赛过程，直头系技术性击倒对手，入四强咁就绝对合理。阿德莱德联有几个主将身高一米九以上，不过佢地加入几个巴西兵之後，踢法可以话系刚柔并重兼粗中带细，尤其系中场线喺队长杜特带领下，压迫感好强擅踢快速反击，加上主场球迷疯狂打气，阿德莱德联有机会喺亚冠盃为澳洲争番啖气。
宾约哥曾经因为想买伊度奥而举世闻名，依家亦有薜高领军同「老波骨」李华度而备受注意，回顾佢地晋级过程，完全靠晒队中几个巴西外援，佢地一旦被冻结就死晒火，呢场作客并唔乐观。另一边厢，大阪飞脚近况平稳，之前亦作客赢过浦和红钻，心理上占优势，对住仲系受主将缺阵困扰嘅浦和红钻应先拔头筹。
