江忠德：车仔表现无愧拥趸

喺欧联出局之後要重新挞番着球队梗系好困难，车仔球员仲系因为衰喺球证手上，本来心情应该更加低落，但系都可以由困境中抽身而出，上场作客大炒兵工厂，车仔嘅表现无愧於佢地嘅拥趸，更加有决心踢好最後两轮英超同赢埋足总杯。

主帅希丁克无论喺战术同心理上都做出适当嘅部署，稳扎稳打等住机会反击入波，喺佢调教之下嘅车仔明显更加稳健，仲有马隆达同艾辛呢几个经验丰富，同时又踢法硬朗嘅球员，所以蓝战士嘅攻击力有目共睹，凌厉反击下下到肉。总算逃出护级漩涡嘅布力般，整体战略明显系主场力拼中下游球队抢三分，但系对强队就避重就轻，会采取战略性放弃，加上之前七个客场输六场丑死怪，而车仔仲有心争做英超二哥唔放软手脚，布力般都系输少当赢喇。