江忠德：英超护级打生打死

英超四队波喺最後一轮为护级打生打死，睇怕米堡上岸机会微乎其微，纽卡素亦要睇人脸色，辛特兰同侯城形势最好，佢地分别喺主场对车仔同曼联，车仔依家只会在意足总杯决赛，曼联就集中备战欧联决赛，作客对住踢到飞沙劈石嘅护级球队，有所保留又有乜出奇。

全世界家阵都系估紧红魔鬼呢场用乜野阵容，既可以留力欧联，但系同时又要对其他护级球队公平，确系顺得哥情失嫂意，之不过，人不为己天诛地灭，费爵爷同球员家阵嘅灵魂已经喺罗马，佢地要将一生人最完美嘅表现呈献喺奥林匹克球场，之前足总杯输畀爱华顿都无所谓，更可况呢场对侯城根本毫无意义，费爵爷半力出击系天经地义，随便班靓仔自由发挥，所以好难期望过高。

当然，侯城亦都争唔落，呢匹升班马喺旧年十月曾经高占第三位系威系势，点知近二十一轮只赢一场，完全走晒样，信心崩溃兼打法无新意，加上队长艾舒比受伤牵一发动全身，锋线无力导致佢地沦落到护级，不过，烂船都有三斤钉，主场对付战意唔系咁强嘅曼联，应该都唔会蚀底，即管睇下佢地唔输有冇机会逃出生天。